اولا اهلا وهلا بكل اللي نصيبهم جابهم البلوج ده او يمكن يكون ده نصيبي انا وكمان اهلا بكل اللي دخلوا علشان يجبروا بخاطري وكمان اللي انا طلبت منهم يدخلوا واللي كانوا مستنيين البلوج ده كمان...منوريني والله
ثانيا بقي انتوا من حقكوا تعرفوا ليه بلوج ؟؟ وامتي البلوج؟؟ وازاي بلوج؟؟
بالنسبة لازاي البلوج ..فده يرجع لحوالي بتاع 8 شهور كده لاني عرفت عن البلوجز من واحد بلوجر قديم وكنت ساعتها رافضة الفكرة تماما لاني كنت حاسة انها حاجة مستفزة اني الناس تقعد تقرا كلام عني او حتي انا اللي كتباه من غير اي تواصل تاني غير شاشة كمبيوتر وماوس وبس وكنت حاسة كمان ان ده فراغ !! بصراحة يعني!!! وده هيخلينا ندخل من غير ماتحس علي السؤال التاني طيب ليه عملت البلوج طالما دي وجهة نظري ؟؟!!؟
الفكرة كلها اني فجأة حسيت اني محتاجة اقعد مع حد لا اعرفه ولا يعرفني علشان احكي.. افضفض..اطلع كل اللي جوه بحلاوته ووحاشته وده كمان هيخلينا ندخل علي السؤال الاخير(شايفين النظام) واجابة السؤال ده هي ان انا بدأت احس بالحاجة دي لاني بجد بقالي مدة حاسة ان الدنيا عمالة تضلم قوي من بره ومن جوه كمان بمعني اني بقالي مده بقابل حاجات كتير قوي خلتني احس ان الدنيا لونها اتغيرقوي وانا كمان اتغيرت من جوه مابقيتش انا بتاعت زمان وقد ايه وحشتني انا بتاعت زمان ونفسي كل الناس تساعدني اني الاقيها من تاني وعلشان كده انا مالقيتش حل غير اني افضح الجديدة دي قدام الناس يمكن تتكسف وتلم نفسها وتاخد بعضها وترحل (هو حل شرس شوية بس هي كمان اشرس وانتوا هتشوفوا بنفسكوا) وكمان يمكن كلامي ده يرجع الاولانية تاني ويمكن يرجع الاولانيين بتوع ناس كتير بس المهم ان الاول ده يكون هو الاحسن.
وكفاية كده بقي لان انا شكلي كده رغاية قوي وده اول بوست بس الجايات كتير ان شاء الله.
